2 x 1

تساؤل عجزت عن الاجابة عنه ؟
لما تحملينه وحدك
تغلقى الباب عليك
تبعدى كل من يحبك عنك
ترفضى أن تقسميه معنا
لماذا تتعذبين عذابا مضاعفا
حقا عجزت عن الامساك بأى إحساس قد يوصلنى لاجابه
هل كان الالم أكبر من اقتسامه مع أحد
هل خجلت أن أواجه أصدقائى بضعفى
هل أردت الاحتفاظ بصورتى القويه أمامهم وأننى أبدا لا أهتز
هل ما كان قد مضى أم أننى مازلت أتجاهله وكأنه لم يكن

لست أدرى ولكنى أدرك يقينا أننى بت أحب كل المقربين أضعاف أضعاف حبى لهم
بدءاً من أصدقائى المدونين
من أحاطونى بحبهم ومشاركتهم وأطواق النجاه التى كانوا يلقون لى بها فى كل كلمه
هم من شاركوا أصدقائى فى غزل حبال طوق النجاه
كل المدونين لكم منى كل الحب والاحترام لمشاعركم التى أسرتنى

نهى وهاله هاتسامحونى على اللى عملته فيكم ؟
ولو انه ولا أثر فيكم ولا منعكم من الوقوف ببابى طوال الوقت

:)
هاله .. شكرا على الورد .. مازال فى غرفتى يعبق المكان براحة الزنبق
نهى .. دموعك غاليه اوى
شيماء .. كنت أعلم كل الوقت أنك تحركى الجميع تجاهى تدفعينهم للاتفاف حولى

وتتصنعى إنصياعك لرغبتى فى وحدتى
بس على مين
عمرو .. محمود .. فيفا .. أغلى الاخوات سامحونى
بعدك على بالى ماقدرتش أكلمك وأنا حد تانى غير حنين
الجندى المجهول
صديقى العزيز
لا تكفيه الكلمات
صديق محترم ورجل المواقف بحق
لا يحب الظهور ويكتفى بالصف الاخير دوما
أبى الا أن يرسل لى طوقا آخر صنعه بيده
لك كل الشكر يا "علي" على وجودك
الدنيا لسه بخير طول ما انتوا موجودين

************************

كما وعدت أن أعود بتاج شيماء

أحلى 15 حاجه بحبهم

لا

انا و خماشر حاجة بحبها

علشان أنا بحب حاجات كتيره أوى
فكان لازم ألجأ لحيله خبيثه شويه
وده اللى هاتشوفوه دلوقتى

بلاد الله
بحب الكويت
مولدى وطفولتى ونشأتى .. مدرستى وحديقتى
هى بعض منى .. هى حنينى الدائم الذى لا يهدأ أبدا
بحب اسكندريه جدااا
وبير مسعود

عائلتى
بابا حبيبى
ماما حبيبى
مش هاكمل الاغنيه
:)
بحب أخويا أوى اللى دايما بحسه إبنى الصغير
وبنته اللى هى فرحة الدنيا كلها

الطبيعه
بعشق البحر
فى كل حالاته .. غضبه وانسيابه وحنوه ومرحه هكذا أراه دوما
صديقى الذى لا يفشى أيا من أسرارى
يحتملنى فى كل حالاتى
السما فى الشتا
والسحب متجمعه بتحكى حواديت وبتتفرج علينا من فوق
تقرب وتبعد وترسم وشوش وأشكال بحب أوى أحددها
الجبال فى طريق سيناء وفى كل البلاد
مخيفه جدا .. مبهره

شفت جبال غضبانه بتخوف أوى
بحس أد ايه أنا صغيره أمام الجبل
حياه أخرى خلف كتل الصخور

الفصول
بحب الشتا جدا
بكل ما يحمله معه دوما من شجن وذكريات مش دايما حلوه
ورغم إنه دايما بيغلس عليا ويفكرنى بالناس اللى رحلوا
يمكن خايف أنساهم ؟
أبدا يا شتا عمرى ما هانسى بابا ولا كل الناس الجميله اللى رحلت فى هدوء

الاخلاق
الصدق
الاحترام

الالتزام وخصوصا فى المواعيد
الصوت الهادى

الزهور
بحب القرنفل اوى
بكل ألوانه
لحد ما مره جابتلى شيماء بوكيه قرنفل أبيض مغلف بورق كوريشه أخضر
يااااااااه على جماله
مش بقدر أنسى أبدا أد ايه كان رائع
من يومها وأنا بحب القرنفل الابيض أكتر من باقى الالوان
الزنبق
ورائحته الخلابه

الالوان
بحب الموف جدااا بكل درجاته وبحب الازرق برده

الحلويات
بحب أوى غزل البنات
وبحب الربسوس
هو حاجه لونها اسود بيبقى فيه منه بمبونى وفيه منه حلويات كده مش عارفه أوصفها
بحب الشوكولاته الكيتكات

المفاجئات
بحب أوى أعمل مفاجأه حلوه للناس اللى بحبها
وبستمتع جدا بمفاجئات أصحابى

بحب التجديد فى كل حاجه

مش بحتمل الروتين فى الحياه

بحسه بيخنقها ويقتل الروح فيها

الهوايات
بحب الرسم
والالوان
والصلصال
بحب أكتب
بحب أحضر حفلات عمر خيرت
بحب منير وبستمتع بكل كلامه

بحب فيروز أوى
وبحب السينما والمسرح

الرياضه
بحب المشى جداااا
وبحب أركب العجله وأسابق العربيات بس طبعا ده فى الصيف

عنى
بحب دموعى لما تخذلنى فى الوقت اللى بحاول أمنعها وتقولى انى لسه انسانه
بحبنى لما بلاقينى قادره أسامح اللى ظلمنى مهما قسى عليا
ممكن أغضب وأحزن أوى بس من جوايا مش بعرف غير انى أسامح
بحب حاجتى أوى وبرتبط بالاشياء
قلمى صديقى من أيام الكليه
قصاصات ورق قديمه بحتفظ بيها
بحب أكلم ربنا كتير مش بس الدعاء وأنا ساجده
بحب كتير أوى وانا ماشيه انى أستغفر ربنا على كل حاجه

المطبخ
بحب جدا أفنن فى الاكل
وأرتب المطبخ
بحب أوى أعمل له ستاره بايدى
وأغلف علب التوابل اللى بحبها
بحب كل حاجه فيه

بحب اصحابى أوى
بحب خوفهم عليا وإحساسهم الدائم بالمسؤوليه نحوى واللى أحيانا بحب أتخلص منه وأقول أنا كبيره
:)
بحب عالمى الجديد
مدونتى وأصدقاء التدوين
بعدك على بالى الغاليه الجميله
وكل الاصدقاء الاخرين ممن تصادقت مع كلماتهم ولم أرهم بعد

وأخيرا
أحب رجل أتخلى من أجله عن كل ما أحب بكل الرضا والحب