العيد فرحه

العيد .. عروسه جميله .. جزمه جديده .. وفستان العيد
شريطه فى ضفايرى
وأنام والتوكه تحت مخدتى قافله عليها ايدى
خايفه أصحى ما الاقيهاش

يبدأ العيد ... كحك وبوسه وحضن كبييير من بابا مع العيديه
وبمب وصواريخ العيد
بخاف منهم بس بحب اتفرج من بعيد

العيد فرحه
نفسى أفرح بالعيد زى زمان ..
بنفس الخوف من بمب العيد .. وعلى شريطة ضفايرى الجديده

كبرت
ومابقاش فيه شريطه جديده بعد ما اتقصت الضفاير
ولا توكه امسكها طول الليل وأخاف عليها
حتى البمب مابقاش بيخوف زى زمان
ولا فيه بوسة وحضن بابا كمان
هو ايه اللى لسه فاضل ما اتغيرش

بأصلى العيد وأزور أعمامى .. وأدور على ريحة بابا فى أحضانهم
برجع بيتنا آكل كحك العيد واتفرج من البلكونه على الجيران الجداد .. أطفال صغيرين
بيلعبوا بالبمب والصواريخ
معرفهمش .. اللى أعرفهم رجعت ما لقيتهومش .. كبروا وسابوا الحى

بس العيد ده أنا هافرح فيه .. ده اللى ناويه عليه
ماجبتش لبس جديد .. مش مهم
هارسم ابتسامه كبييييره على شفايفى يمكن أشوفها وأصدقها
هاشترى غزل البنات .. وأقف جنب الولاد .. ويمكن أتشجع وآخد منهم واحده
أحدفها بعييييد تفرقع بصوت عالى
أكيد الولاد هايضحكوا علي .. كبيره كده وبتفرقع بمب معانا
معلش ما انا كمان هاضحك .. عليهم أو عليا .. مش مهم
المهم أضحك فى العيد