حنيـــــــــن

Sunday, November 26, 2006

بحــر الحيــاه



أحن الى أبى وصدر أبى وحضن أبى
أختبئ فيه من ألمى وحزنى ومن نفسى
أغمض عيناى على دموع منسابه فى صمت مهيب
لا وقت للسقوط
هكذا كان يردد دوما

.....

كل ما يحيط بك يدعوك للتهاوى والانهيار
ورغم ذلك شيئ ما يسند ظهرك
يمنعك من السقوط
تهتز قدماك توشك أن تقع
تجد حائط سميك يمسك بك
يلتف حولك
بين الحلم والضوء الشديد الذى يغمر المكان
ياتى صوت من بعيد تعرفه جيدا
لابد أن تنتهى اليوم من ... ومن ... و
لا وقت للانكسار
لم يعد يجدى .. ولن

.....

تنظر الى وجهك فى المرآه
وللعجب تجدك تبتسم
ابتسامة غريبه ولكن يكفى نجاحك فى انتزاعها

تغسل وجهك
دموع حاره تنساب بين يديك تمتزج بقطرات الماء الدافى الذى يلامس وجهك
تختار ثياباً عاديه تماما بسيطه تصلح للمشى الطويل
تترك الموبايل فلم تعد بحاجه اليه
تضع سماعات صغيره على أذنيك
يصلك منير
يخبرك بان

الدنيا بتاخد وبتدى والليل لو طول هايعدى
وبلاش نستسلم يوم للحزن مادام عايشين
.
.
.

تبتسم مع أخر دمعه تنساب على وجنتيك
وتمضى

...


بحــــر الحيــــاه

16 Comments:

  • الدنيا بتاخد وبتدى والليل لو طول هايعدى
    وبلاش نستسلم يوم للحزن مادام عايشين

    لله
    روعه

    By Blogger barrak, at Monday, November 27, 2006 12:36:00 PM  

  • الدنيا بتاخد وبتدى والليل لو طول هايعدى
    وبلاش نستسلم يوم للحزن مادام عايشين

    هتلاقيه بيقول وبلاش نستسلم للحزن ما دام عايشين
    وكمان
    لو نفتح للدينا قلوبنا هتدق الاحلام على بابنا

    تصدقي بقولك الكلام دا وكمان بقوله لنفسي, برضه
    !!

    By Anonymous Anonymous, at Monday, November 27, 2006 2:03:00 PM  

  • الصوره حلوه اوى
    خليكى زيه ".

    و الاغنيه بتلمس حاجه جوانا
    انا باحبها رغم انها حزينه

    By Blogger Dananeer, at Monday, November 27, 2006 8:48:00 PM  

  • الجميلة حلم
    يمكن مع كل دمعة من عين حزينة بيكون نداء للروح من جوه بتقولها غسلت عنك الم وشفيت منك جرح

    الدموع نعمة وبتطهرنا من جوه بتخلينا نحس برغم قسوة كل شىء حولنا والقوة المصطنعة فى حياتنا لا نملك ان نوقف عبرات من اعيوننا
    لم قلوبنا بتصفى وبيروح عنا الحزن بنتعلم وبنقوى وعودنا بيصلب يواجه ريح ورى ريح

    بدموعك هتكونى اقوى

    By Blogger tota, at Monday, November 27, 2006 11:29:00 PM  

  • barrak

    اهلا بك أول مره تزورنى
    وعلى فكره دى كلمات منير مش كلماتى

    :)

    بس هى فعلا رائعه
    سعيده انها استمتعت بها

    تحياتى





    العزيز حائر فى دنيا الله


    مصدقاك
    مصدقه أوى كمان

    لاننا كتير بنعمل كده
    بنردد للاخرين اللى بنحاول نقنع نفسنا بيه

    هو بس الليل لو يعدى
    هانقدر نفتح للدنيا قلوبنا
    يمكن تدق الاحلام على بابنا

    By Blogger حنيــــــن, at Tuesday, November 28, 2006 12:07:00 AM  

  • العزيز حاول تفتكرنى

    مش مشكله ولا حاجه
    هى صعبه صحيح بس لو فكرنا شويه هانلاقى ان أكتر منها عدى برده

    عارف
    انا لما بتقابلنى مشكله كبيره اوى
    وبحس انها خلاص هاتكسرنى

    زى الموجه العاليه اوى اللى بره دى

    بفتكر أصعب حاجه مرت عليا وقلت انى خلاص انتهيت عندها

    "وفاة بابا"

    بلاقي انى عشت بعدها
    وفرحت وضحكت كمان
    قدرت
    وماتكسرتش زى ما كنت فاكره

    يبقى اى حاجه تانيه هاقدر اعديها برده
    صحيح مؤلمه بس هاتعدى



    الجميله dananeer

    خلينى زى البحر تقصدى ؟
    صعب اوى
    بالذات فى الحاله دى
    أد ايه مخيف

    ما أظنش هاقدر
    بس أقدر اسمع كلام منير

    كلماته بتلمس حاجه جوانا
    علشان بيحاول يمسك ايدينا ويشدنا قبل ما نقع

    وده بنبقى محتاجينه اوى



    tota الجميله

    اد ايه كلماتك جميله اوى

    انا دايما بحترم دموع الاخرين ودموعى انا كمان

    بحسها بتقول هنا لسه فيه انسان
    بيحس وعنده مشاعر

    صحيح فى الازمه مش بشوف حاجه منها
    :)

    بس فعلا بعدها بتوازن وبشوف الامور أوضح وأهدى كتير

    تحياتى

    By Blogger حنيــــــن, at Tuesday, November 28, 2006 12:21:00 AM  

  • فعلا كل حاجه ممكن تعدى وبتعدى

    بس بتاخد مع كل مرة حته مننا

    مرة من براءتنا و مرةاحاسيسنا و ساعات اندهاشنا و ايام ثقتنا فى نفسنا او فى اللى حوالينا، و..
    والاهم انها بتاخد جزء من رغبتنا فى الحياة


    رغم كلامك عن ضرورة التجاوز واللى انا عقليا مقتنعه بيه، الا انى فيما يبدو عمليا مش قادرة اتعامل معاه
    يمكن فعلا رغبتنا فى المقاومه بتخلص ، يعنى

    محبتى

    By Blogger بعدك على بالى, at Tuesday, November 28, 2006 12:29:00 AM  

  • بعدك على بالى


    لاااا
    الله يسامحك
    ليه كده بس
    ده أنا بحاول بكل الطرق أنى أتماسك وأتوازن وبقول لنفسى كل الكلام ده

    أنا عارفه انها بتاخد من ثقتنا فى نفسنا وفى اللى حوالينا
    ورغبتنا فى الحياه
    ورغبتنا فى المقاومه

    ويمكن لو اللى جرحونا كانوا يعرفوا أد ايه ألمونا كانوا ها يرأفوا بينا

    بس ده اللى حصل
    ومعندناش بديل عن مواجهته
    ومقاومته

    والا هانقع
    عارفه يعنى ايه نقع ؟

    يعنى نبقى ولا حاجه
    ولا حد

    الناس كلها بتمشى وبتجرى كمان
    لو وقفتى يا إما ها يدوسوكى ومن غير حتى ما هايحسوا بده

    يا إما هايمروا عليكى فى طريقهم
    اه هايشوفوكى
    بس هايكملوا مسيرتهم
    وهاينسوكى

    ماينفعش نقع
    صدقينى لا بديل عن المحاوله

    أقولك أنا بعمل ايه ؟
    طبعا بدعى ربنا طول الوقت انه يساعدنى

    وبحاول أعمل أى حاجه مبهجه بحبها
    بسمع اغنيه فرحانه
    بشترى لنفسى الورد اللى بحبه
    بخليه جنبى بنام وبصحى على ريحته الجميله ومنظره المبهج
    ولو ان المره دى صاحبتى هى اللى جابتهولى

    البسى حاجه خفيفه وتعالى امشى معايا
    :)
    ونفكر سوا نعمل ايه
    اتفقنا ؟

    ربنا يسعدك ويبعد كل الهم عنك

    By Blogger حنيــــــن, at Tuesday, November 28, 2006 12:57:00 AM  

  • تنظر الى وجهك فى المرآه
    وللعجب تجدك تبتسم
    ابتسامة غريبه ولكن يكفى نجاحك فى انتزاعها
    ==========================

    nice post
    تحياتي

    By Blogger Carol, at Tuesday, November 28, 2006 2:04:00 AM  

  • كان فيه زمان أهاليك

    يا صاحبي وكان في الدنيا ليك

    مطرح ومرسى يرسِّيك

    في أي مكان في الدنيا كان

    كان وكان وكان

    الكلام لمجدي نجيب و اللحن لأحمد منيب
    مش عارف ليه هذه التدوينة ذكرتني بوجه وكلمات الراحل الجميل أحمد منيب

    By Blogger Ahmed Rashwan, at Tuesday, November 28, 2006 7:59:00 AM  

  • لو احجة هزيتنى
    برسم
    وبحلم
    ويحكى لربنا

    By Blogger dandana, at Tuesday, November 28, 2006 11:23:00 AM  

  • carol

    اهلا بكِ وبكل الاسكندرانيه
    :)


    film69

    اول مره اسمع الكلمات دى
    بس طبعا أعرف العبقرى أحمد منيب

    تحياتى


    dandana

    اللى فهمته انك عجبك انى برسم وأحلم وبحكى لربنا

    ده فعلا
    والحكى مع ربنا أد ايه ممتع
    مش بس لانه عباده - الدعاء - لكن أد ايه مريح جدا
    انتى بتبقى عارفه انك بتكلمى وبتشكى وبتفضفضى مع الوحيد اللى يقدر يساعدك
    ويفهمك
    ويحافظ على اسرارك
    ويتفهم ضعفك
    لانه أد ايه بيحبنا

    تحياتى

    By Blogger حنيــــــن, at Tuesday, November 28, 2006 12:01:00 PM  

  • الدنيا لسة بخير ؟؟؟

    By Anonymous Anonymous, at Wednesday, November 29, 2006 8:38:00 PM  

  • اكيد الدنيا لسه بخير

    وأكيد برده فيه ناس مليانه خير

    لو صادفناهم نبقى أد إيه محظوظين والمفروض نطبق عليهم ايدينا وقلوبنا ونحمد ربنا على النعمه الجميله دى

    ولو فارقناهم
    ده العذاب الغير محتمل فعلا
    لانها بتبقى مصيبه كبيره وفقد لحد أد ايه غالى صعب يتعوض

    رغم كل حاجه ... صعب ننكر ان الدنيا لسه بخير

    By Blogger حنيــــــن, at Wednesday, November 29, 2006 8:49:00 PM  

  • 7bet 22olek 7aga ya 7nin 2n rbna m3ana daiman wakeed mesh binsa 7ad mhma kanet 2l zerof aw mhma kan 2l mawkef 2l mohem en ykon 3ndena seka kamla en rbna m3ana daiman fe kol 7aga wlaw fakrna keda akeed kol 7aga ht3dy
    dina

    By Anonymous Anonymous, at Friday, December 01, 2006 6:29:00 PM  

  • zay manty 2olty khalikikawia we 23rafy 2n babaky ye7b yshofek qawyea we 7awly dayman teftekry kalamo 2l kan byshaga3ek bi we lazem tefdali wa2fa tol ma 2nty m3aki rabena

    By Anonymous Anonymous, at Tuesday, June 19, 2007 9:10:00 PM  

Post a Comment

<< Home