حنيـــــــــن

Wednesday, November 22, 2006

أحـــلام عمـرنا






!!! مين قال ان أحلامنا مرتبطه بعمرنا

أنا قلت

كنت دايما بقول ان كل حلم من أحلامنا مرتبط
... بسن معين

لو إتأخر شويه تبقى فرصته راحت مننا

بس دلوقتى

تتأخر شويه !!!؟

وإيه يعنى
بردو طعمها حلو

بالعكس بقى طعمها أحلى كتير

لاننا بنكون نضجنا وعرفنا واتأكدنا أكتر ومرت سنين علينا
واحنا متمسكين بحلمنا

حلمت دايما بدراسة الفنون
بحب الرسم من طفولتى .. عشقت الصلصال
وشكلت أحلامى بيه
فى الطريق حَوِدت
وكانت الهندسه طريقى

دخلت وخرجت زى ما دخلت بنفس الحلم
ما اتغيرش ولا استخبى ولا نسيته يوم

فين الصلصال والقلم الرصاص والفرشاه

بس ده خلاص

النهارده انتظمت خلاص فى الدراسات الحره
مسكت قلم فحم ورصاص وألوان كمان

رجعت الكليه تانى
ودى فرحه تانيه خالص
كنت بتنطط من السعاده

جريت على نهى ماسكه ال
art bag
فرحانه أوى بيها

أكتر من فرحتى بأول شنطة مدرسه
أو حتى بحرف ال
T
أيام الهندسه

وقتها مكنتش مستوعبه فيه ايه
هاروح المدرسه علشان كلنا لازم ندخلنا
ونخرج منها على أحلامنا أو أقدارنا اللى بتخالف الحلم ده

اللهم لك الحمد حتى ترضى

دايما بترضينى
بتتأخر دايما الحاجات .. بس بطلت أستعجلها
بعد ما عرفت إنها دايما جايه

بس فيه حكمه مستخبيه دايما ورا توقيتها

أنا سعيده أوى وحبيت تشاركونى فرحتى




38 Comments:

  • حنين بجد فرحتينى اوى اوى بالبوست
    ده كان حلمى
    انا حسيت انك بتكتبى عنى
    انا كمان دخلت هندسه و منسيتوش
    و اتمنى امسك القلم الرصاص و ارجع اشخبط من تانى
    بجد انتى بسطينى
    كفايه ان الاحلام متضيعش فى السكه
    مستنيين الابداعات

    By Blogger Dananeer, at Thursday, November 23, 2006 1:37:00 PM  

  • كل واحد له أحلام ....وفعلا الأحلام دي بتكون أحلام لمرحله معينه ..أو حلم ممكن يكون مستحيل شوي.........بس المهم ان انمت تكوني مبسوطه ,,,,وحاجه جميله جدا ان انت تعملي حاجه بتحبيها
    .

    By Blogger إنسان || Human, at Thursday, November 23, 2006 5:35:00 PM  

  • ربنا يسعدك دايما
    يا رب
    تحياتى يا جميلهالروح

    By Blogger raspoutine, at Thursday, November 23, 2006 8:28:00 PM  

  • فرحتينى يا حنين
    عارفه يعنى إيه
    وجود
    بِيفرًح
    وجودك فى الدنيا دى
    كتابتك البريئه
    أحلامك
    شوفك
    حضورك
    طفولتك اللى بتتنطط فرح
    وانتى ماشيه لبراح أحلامك البسيطه البيضا
    إنتى إنسانه مُفرحهْ
    بتحرضى اللى حواليك ع الفرح
    مش لائى كلام أأوله يا حنين
    غير إنى فرحان بوجودك فى الدنيا
    وبتمنى ليك من ألبى
    كل الفرح

    By Blogger مجدى سرحان, at Friday, November 24, 2006 1:54:00 AM  

  • حنين الحلم والواقع

    فعلا لو بطلنا نحلم نموت، وطالما حلمك لسه جواكى اكيد يوما ما حيبقى فى ايدك و اكيد حتنجى فيه..

    سعيدة لسعادتك ويارب كل احلامك تتحقق وتترجم لحقيقة وواقع ملموس

    تحياتى يا اجمل وارق حنين

    By Blogger بعدك على بالى, at Friday, November 24, 2006 2:28:00 AM  

  • dananeer

    من فضلك ما تتنازليش عن حلمك أبدا
    ودايما لسه فيه وقت لاحلامنا

    وخصوصا لما تبقى بسيطه وجميله كده

    انا اللى مستنيه منك اخبار حلوه

    :)



    human

    انا معاك فى ان كتير من الاحلام مرتبطه بمرحله معينه

    بس برده ينفع نحاول نوصل لها
    مش مفروض اننا نيأس ابدا او نتنازل عن حلمنا


    raspoutine

    متشكره اوى على الدعوه الجميله
    ده بجد من ذوقك بس

    ربنا يسعدك انت كمان

    تحياتى




    مجدى سرحان

    حمدالله على سلامة ظهورك تانى
    انا بجد مبسوطه انى كنت سبب انى افرحك كده

    ولو انى مش شايفه انى
    "انسانه مفرحه"
    :)

    يعنى مساحات الشجن عندى كبيره اوى
    بس بجد اسعدتنى بحضورك ومشاركتك

    وفى انتظار عمل جديد بقى




    الغاليه بعدك على بالى

    معنديش كلمات ارد بيها على مشاعرك الجميله دى غير انى بجد بتمنى من كل قلبى انك تكونى اسعد الناس

    لانك فعلا تستحقى ده

    ومن فضلك ما تغيبيش ابدا

    By Blogger حنيــــــن, at Friday, November 24, 2006 12:23:00 PM  

  • enty handasa enty kaman :D ?????
    welcome :D

    By Anonymous Anonymous, at Friday, November 24, 2006 2:44:00 PM  

  • ربنا يسعدك دائما وأبدا
    وأنا أؤمن أيضا بنفس الفكرة.. أحلامي جاية جاية
    دايما في الآآآخر بتيجى
    ربنا أكرم من ما إحنا ممكن نتخيل

    By Blogger دينا فهمي, at Friday, November 24, 2006 5:43:00 PM  

  • الف مبروك يا حنين انا فرحانة اوى ليك واحب انك تعرفينا انت بتعملى دراسات حرة فين لا كلنا هذا الرجل
    واتمنى لكى كل التوفيق وربنا يسعد حياتك وتحققك كل احلامك

    By Blogger Amany, at Friday, November 24, 2006 7:00:00 PM  

  • كان نفسي اكون اول المهنئين
    تخيلي امبارح رحت على مكتبت سمير و علي
    و جبت اقلام فحم من تاني
    اصلي كنت برسم
    بس الحياه شغلتني وبطلت بس حارجع
    تاني
    يا رب يسعدك على طول
    و تحققي كل احلامك
    الكبيره منها و الزغنونه
    :)

    By Blogger ام العيال, at Friday, November 24, 2006 7:20:00 PM  

  • daisy

    انا كمان هندسه
    :)
    على فكره انا بستمتع عندك بعزف البيانولا

    اهلا بيكى



    dina fahmy

    فعلا ربنا اكرم بكتير
    بس احنا اوقات بنحتاج اللى يفكرنا
    بان ربنا قريب مننا اوى
    وبان احلامنا لسه نقدر نحقق ولو جزء منها



    amany

    انا متشكره اوى يا امانى
    وحاسه بالفرحه بجد فى صوتك
    ودعواتك الجميله
    ربنا يسعدك يا رب

    انا يا ستى بدرس فى كلية الفنون التطبيقيه

    والحقيقه الناس هناك فرحانه اوى بحد هاوى الرسم ومش بيتاخروا ابدا

    يلا تعالى معايا

    :)


    حبيبتى احلى ام عيال فى الدنيا

    انا مبسوطه اوى انك بترسمى
    كده بقى فيه بيننا اكتر من حاجه مشتركه

    :))

    ارجوكى ارجعى ارسمى تانى
    ده الشباك الجميل اللى بنطل منه على الدنيا

    تحياتى

    By Blogger حنيــــــن, at Friday, November 24, 2006 7:29:00 PM  

  • انا فرحناك عشان قدرتى تتمسكى بحلمك
    مبروك

    انا كمان عندى حلم..وان شاء الله هاحققه...

    لسا بستمتع بالموسيقى فى البلوج....
    انتى عملتيها ازاى يابنتى...
    عايزة احط حاجة انا كمان

    By Blogger dandana, at Saturday, November 25, 2006 11:58:00 AM  

  • مبسوطة علشانك قوي

    By Blogger radwa osama, at Saturday, November 25, 2006 12:29:00 PM  

  • دي القاعدة الذهبية...اللي مصر على حاجة بيوصلها يعني بيوصلها...ربنا مبيكسرش بخاطر حد ابدا...مبرووووك

    By Blogger frozen love, at Saturday, November 25, 2006 1:24:00 PM  

  • الرسم والكتابه أشكال من أشكال الخيال بينسجولنا خيوط بيضا في الضلمه ممكن نعيش في الخيال الأحنا رسمناه ونبعد شويه عن الواقع

    كويس انك دورتي علي حلمك وحققتيه وانا فرحانلك اوي

    By Blogger Saikoman, at Saturday, November 25, 2006 1:54:00 PM  

  • الجميلة حنين
    سعادتك وصلتنا من كلامك وسعدنا معك اكثر من قدر سعادتك انت فكلنا نبحث عن اى امل او اى شىء مبهج

    الحلم لا وقت ولا ميعاد ولا زمان ولا مكان لذك هو حلم فنظل نحلم بكل الاشكال بطفولة وبصبا وبشباب وبنضج فى اى وقت لكن ان يصبح الحلم حقيقة هذا هو الجميل حقا

    تحياتى

    By Blogger tota, at Saturday, November 25, 2006 2:36:00 PM  

  • عقبالي يا رب
    انا نفسي انتسب لاي دراسة حرة للفن و الرسم و الديكور
    بس للاسف للغربة احكام
    يظهر ان حلمنا واحد يا حنين
    و سعادتي انك قدرتي تحققيه
    ---
    نزلي اول باول اعمالك علي البوست
    و فرحيني كمان و كمان
    :)

    By Blogger كلبوزة لكن سمباتيك, at Saturday, November 25, 2006 11:15:00 PM  

  • أولا

    ألف مبروك

    تستحقين التهنئه

    قلائل من يحصلون علي أحلامهم

    أو يستطيعون تحقيقها

    كثيرا ما تتحول تلك الأحلام الي مجرد حنين

    الي زمن كنا نحلم فيه

    ثانيا تحياتي

    والسلام

    By Blogger سندباد مصري, at Sunday, November 26, 2006 12:06:00 AM  

  • مبروك ان حلمك بدأ يتحقق و ياريت تستمتعى بكل لحظة فيه
    ياريت حلمى انا برضه يتحقق , و اكيد باذن الله مش هنساه ومش هستعجله برضه

    By Blogger Khaled gad, at Sunday, November 26, 2006 3:44:00 AM  

  • حنين الاحلام رائعه وتحقيقها اروع
    والايام تذهب ولا تعود
    والعلاقة بين الزمن وبين ما نتمنى عكسيه والسعيد من انجز في يومه حلمه والاسعد هو من لم يتخلى عن شيء من احلامة الصادقه
    تمنيت شيئا ولم يتحقق لي حتى اليوم ولكنني مقتنعه رغم كل العراقيل التي صادفتها انني سأحقق ما اردت دوما او سأضل احاول الى اخر يوم من عمري
    تحياتي لك ولاحلامك ولاحلام الجميع

    By Anonymous Anonymous, at Sunday, November 26, 2006 8:46:00 AM  

  • لاقيت في كلامك نفسي زى ميكون الايام رجعت ليوم انتسابي لقسم الدراسات الحرة بفنون و انا بدرس تجارة
    حلم متمسكتش بيه وقتها حسيته اتحقق من اول يوم قررت ادرس حر
    بعدها مرت سنين و الحلم برضك فضل جوايا هواية بحبها بس بلا ملامح
    كنت دايما حاسه ان جوايا ممكن ابدع افنن ارسم اعبر بشكل خاص
    الايام خدتنى و الاولاد و زي ما قلتي يا حنين لكل مرحلة عمرية حلمها الا حلم مرتبط بموهبة ربنا وهبها لينا بتكون مرتبطة بكل العمر
    دوقتي لاقيت حلمى بشوية تفانين الكمبيوتر و الانترنت
    و لانه كان حلم هواية و ليس احتراف بلاقيه في كل ابداع في كل فكرة في كل تصميم بيعبر عن معنى
    بحب في الانسان قوته
    اصراره على حلمه
    و الشئ ده عجبني فيكي فكان لازم اباركلك و يا رب دايما اباركلك على كل خطوة جريئة تقولى فيها انا مصممه على هدفي
    تحياتي لحنين على مدونتها الرائعة و افكارها الاروع و اسفة للاطالة

    By Blogger Neveen Ali, at Sunday, November 26, 2006 12:40:00 PM  

  • كما هو المعتاد " معى على الاقل " أن
    يتزامن الفرح دوما مع الالم

    كنت قد أغلقت باب غرفتى وأطبقت يدى على قلمى فى محاولة لرسم بعض الاشياء

    وقد فشلت تماما

    ورأيت التعليقات المتفائله الجميله
    فأعادت لى بعض من روحى

    أشكركم أصدقائى على هذا الدعم ومشاركتكم الفرحة معى بكل هذا الحب والود

    أتمنى لكل منكم أن تتحقق أجمل وأهم أمانيه وأحلامه إن لم تكن كلها

    By Blogger حنيــــــن, at Sunday, November 26, 2006 1:48:00 PM  

  • dandana

    من كل قلبى بتمنى وبدعيلك تحققى حلمك وان شاء الله هاتقدرى
    اقفلى ايدك عليه اوى
    وما تنسيهوش فى زحمة الحياه

    بخصوص الموسيقى على البلوج
    فدى حاجه عاوزه شرح طويل
    لو ممكن تدينى فرصه بس أركز وأقولك ازاى
    ممكن ؟

    متشكره دندونه



    radwa osama

    مجرد اهتمامك تدخلى وتقولى الكلمه الجميله دى عندى كتير اوى
    بجد بجد أسعدتينى بمشاركتك فرحتى
    بتمنى لك كل الخير



    frozen love

    فعلا .. ربنا ما بيكسرش بخاطر حد أبدا
    ولو حسينا للحظه اننا اتكسرنا او بعدنا
    بعدها على طول ربنا بينور لنا طريق تانى
    ومن نفسنا بنحس اننا غلطنا لو كنا حزننا على حاجه ما اتحققتش

    الله يبارك فيك

    By Blogger حنيــــــن, at Sunday, November 26, 2006 1:49:00 PM  

  • saikoman

    عجبنى اوى تعبيرك
    بينسجولنا خيوط بيضا فى الضلمه

    فعلا كتير بنبقى محتاجين نبعد اوى عن الواقع

    الحمد لله اننا عندنا ادوات نبحر بيها
    بعيييييد

    متشكره لمشاعرك الجميله اوى



    tota

    مش تقولى يا توته انك معندكيش بلوج
    !!!

    تعبتينى اوى وانا بحاول كتير ادخل عندك
    لحد ما قرات لك تعليق عند حد بتقولى انك بتعلقى بس

    ممكن تحاولى تكتبى
    احساسى بيقولى انك عندك كتير
    اكتر من متابعة الاخرين واسعادهم بآرائك وتعليقاتك الجميله

    وصلتنى فرحتك اللى طالعه من القلب

    بشكرك جدا


    aymen.farouk

    جميل انك بتقدر تحلم حتى وسط الحزن

    دى حاجه مش سهله ابدا
    لاننا غالبا فى حالة حزننا بنبقى محبطين اوى
    ويمكن أضعف من اننا نتعلق باى طوق حتى لو جنبنا

    اد ايه كلماتك جميله
    حاضر
    مش هانسى أغمض عينيا أبدا
    :)
    ربنا يحقق كل احلامك

    By Blogger حنيــــــن, at Sunday, November 26, 2006 1:51:00 PM  

  • كلبوزه لكن سمباتيك


    عقبالك يا رب
    ترجعى بالسلامه وتحققى كل أحلامك
    لسه شويه على ما أتشجع وأنزل أعمالى
    بلاش احراج
    صحيح انا اتحسنت كتير بس لسه شويه

    انا سعيده اوى بزيارتك الجميله دى
    وبفرحتك اللى واصلانى اوى

    :)


    سندباد مصرى

    أولا وثانيا وثالثا انا متشكره جدا لتهنئتك الجميله اوى
    والحمد لله ان فيه حلم اتحقق ومابقاش مجرد حنين
    سعيده اوى بزيارتك

    على فكره انا عاوزه اعرف الحدوتك بتاعتك خلصت كده ؟
    :)



    بحب مصر

    يارب حلمك يتحقق وتفرح بيه
    وفعلا اوعى تستعجله
    اعمل بس كل اللى عليك علشان تقصر المسافه وتقرب منه
    وان شاء الله ربنا ها يفرحك بيه

    By Blogger حنيــــــن, at Sunday, November 26, 2006 1:52:00 PM  

  • الهام

    جميله اوى يا الهام العلاقه العكسيه اللى اشرتى ليها بين الزمن واحلامنا

    بحييكى بشده على روحك العاليه وتمسكك بحلمك الجميل
    وانا كمان دايما بصدق اننا نقدر نحقق كتير من احلامنا
    الفكره اننا ما نيأسش ابدا
    ونسعى دايما
    وربنا مش هايخيب ظننا

    تحياتى



    منة الله

    اد ايه انتى جميله
    عارفه
    هو الجميل اننا برده ننتبه لاحلام تانيه ربنا حققهالنا ونسعد بيها

    ومانفضلش نندم على حلم راح وفى ايدينا احلام تانيه جميله برده

    عجبنى اوى انك ورغم ان الحياه بعدتك عن حلمك لكن
    بتلفى حواليه برده
    :)

    جميل اوى لما بنرضى ونحاول نكيف نفسنا بين واقعنا واحلامنا

    ربنا يبارك فى الاولاد ومامتهم وباباهم
    وبشكرك جدا على كلماتك الرقيقه
    بس لو كنتى تطولى شويه
    :))

    By Blogger حنيــــــن, at Sunday, November 26, 2006 1:53:00 PM  

  • حاول تفتكرنى

    حيرتنى
    قرات تعليقك اكتر من مره
    وحاولت امسك الحلم والهدف كل واحد فى ايد
    واشوف الفرق بينهم

    تعرف انهم فعلا قريبين اوى من بعض

    بس بحس ان يمكن الحلم اوقات بيبقى اكبر من امكانياتنا
    يعنى بنسيب نفسنا نحلم بحاجات جميله حتى لو احيانا مستحيله

    عكس الهدف اللى دايما بنربطه بقدراتنا اللى احنا عارفينها كويس
    اوقات بيعديها بس مش بكتير

    يعنى انا دلوقتى اقدر اقول انه كان هدفى مش حلمى

    :)

    بتسعدنى تعليقاتك وكتاباتك

    By Blogger حنيــــــن, at Sunday, November 26, 2006 6:19:00 PM  

  • السلام عليكم
    أولا ربنا يوفقك دايما و يفرحك علي طول
    ثانيا ممكن أحسدك شوية
    ثالثا بجد البوست بتاعك ده أعطاني نفحة أمل بعيد أة بس أمل يارب يتحقق
    اللي أتمناه بس بسرعة شوية علشان أنا محتاج ده بجد جدا دلوقتي

    By Blogger No Fear, at Sunday, November 26, 2006 6:34:00 PM  

  • What is a dream
    it is something live in our world
    deep inside us
    it grow everyday take more speace and give our soul more joy
    give our life more light
    give our lungs more fresh air to breath
    give our eyes more stars to see in the night sky
    as we deal in life we deal with dreams
    we either see them go by
    or make them a reality
    the more u love your the more it gonna be real
    keep it up 7anin ur soul is full of joy

    By Blogger Abu Salah, at Sunday, November 26, 2006 6:38:00 PM  

  • دخلت هنا اكثر من مرة

    اريد ان اعلق

    اخشى ان المس هذه الرقة من الكلام
    باصابعى التى اصابها الزمن بالتعاريج
    وتوارى جمالها بين نقاشات العمر

    خفت ان اجرح هذه الرقة باصابعى الا ان التوازن قد تفلت منى وهربت منى يدى باكملها

    لتكتب عندك

    جميلة فرحتك اوى يا حنين

    والسلام

    By Blogger cast2way, at Sunday, November 26, 2006 7:08:00 PM  

  • no fear

    وعليكم السلام ورحمة الله وبركاته
    طبعا ممكن تحسدنى شويتين كمان
    كفايه انى قدرت ادى حد شوية أمل فى الايام الكئيبه دى

    وبدعيلك يارب يحقق لك كل اللى تتمناه وبسرعه كمان
    بس يكون ليك خير فيه الاول

    خد بالك اوى

    اوقات بنتمنى حاجات وبدعى ربنا كتير اوى عليها

    ويمنعها عننا
    ونكتشف بعد كده انها ماكانتش خير زى ما احنا كنا فاكرين

    ربنا يسعدك ويرضيك دايما



    abu salah

    اهلا بيك
    جميل تعريفك للحلم فى حياتنا
    واضح انك حاسه اوى
    ولامسه كمان
    بشكرك على ذوقك وبتمنى انت كمان تحقق احلى الاحلام يارب

    تحياتى



    cast2way

    صديقى العزيز
    وانا برده بقول ما ينفعش ما تعلقش

    مش ممكن بجد تعبيراتك البديعه دى
    والحاله الجميله اللى بتبقى فيها
    سواء وانت بتكتب او حتى فى تعليقاتك

    بشكر التوازن اللى تفلت وسمحلك بالتعليق عندى
    :)

    هى كده الفرحه دايما جميله
    ربنا يفرحنا كلنا دايما

    By Blogger حنيــــــن, at Sunday, November 26, 2006 7:49:00 PM  

  • لو بطلنا نحلم نموت
    ربنا يزيدك فرحة

    By Blogger LAMIA MAHMOUD, at Sunday, November 26, 2006 10:25:00 PM  

  • lamia mahmoud


    لو عافرنا نقدر نفوت

    ربنا يكرمك ويسعدك ومتشكره على الدعوه الجميله اوى

    :)

    By Blogger حنيــــــن, at Sunday, November 26, 2006 11:39:00 PM  

  • أولا مبرووووك يمكن جت متأخرة شويةو يمكن أنا ما اعرفكيش وده مش يمكن ده أكيد ولا عمرى شوفتك بس بجد فرحتيلك اوى حلو اوى ان الواحد يحقق حلمه وهدفه وربنا يوفقك ويكرمك فى الدراسة ونشوفك فنانة كبيرة اللهم انفعنى بما علمتنى وزدنى علما من عندك اللهم إنى أستخيرك بعلمك واسألك من فضلك العظيم

    By Blogger MeShMeShA, at Tuesday, November 28, 2006 5:47:00 PM  

  • meshmesha

    فعلا ماكنتيش تعرفينى
    ولا انا أعرفك
    بس ده كان لحد ما شرفتينى بالزياره
    ولحد ما هازورك برده

    من اللحظه دى بنتعارف بشكل جميل
    انا بحسه كده

    بشكرك جدا على مشاعرك الجميله وتمنياتك الطيبه
    ومش متاخره ولا حاجه

    ربنا يسعدك ويحقق احلامك كلها

    By Blogger حنيــــــن, at Tuesday, November 28, 2006 5:57:00 PM  

  • 7lw awy ya 7anin 2n enty mstslmtish ll2mr 2l wake3 w2olty 5las,bgd 7elw en 2l 7elm fedel m3aky l7ad mgat 2l forsa 2l monsba 3lshan t722e rbna ywfa2ek en shaa alla dina

    By Anonymous Anonymous, at Friday, December 01, 2006 6:38:00 PM  

  • اهنيك اول حاجه
    وقولك انا معاك الحلم مايرتبط تحقيقة بس معينه

    By Anonymous Anonymous, at Wednesday, December 20, 2006 3:11:00 AM  

  • الضيف المجهول / المجهوله
    أهلا بك وبزيارتك اللى اهتميت فيها بقراءة حلم جميل اتأخر كتير بس الحمد لله ما ضاعش

    :)

    By Blogger حنيــــــن, at Wednesday, December 20, 2006 11:01:00 AM  

Post a Comment

<< Home