حنيـــــــــن

Monday, February 26, 2007

تساؤلات..!!!!! ؟



ماذا نفعل عندما يتألم من يجرى دمه فى عروقنا

...

نكتفى دوما بالدموع المنسابه فى صمت
هل هذا ما كان يحتاجه منا
هل نخذله دوما بتلك الدموع
أجزم أنها آخر ما كان ينتظره
...

عندما تدخل روح الشر لتعصف بكل ما يحيط بنا
وتحيله رمادا حالك السواد
ليس رمادا
إنه يشبه تلك الماده الاسفلتيه التى تستخدم فى رصف الشوارع
عندما يلامسك يلتصق بك ويعلق بملابسك ويدك ولا تستطع أن تتخلص منه
ويكسو كل الالوان بالسواد
...

عندما كنت صغيره صدقت كل القصص والحواديت
وصدقت أيضا أن النهايات السعيده تصاحب دوما أصحاب القلوب البيضاء
حتى كبرت
وتعلمت أن الحواديت هى مجرد صفحات تروى من الاساطير
نظلم أنفسنا عندما نصدقها
و ننتظرها
...

علمنى أبى
عامل الناس كما تحب أن يعاملوك
ونسي – ربما – أن يعلمنا ماذا لو أساء لنا الأخرون
وجرحونا
ووجعونا

...

ليه بنجرح ونوجع مادام بنرجع تانى نندم
ونعتذر
ونتوسل

...

هى الناس بتنسى أحيانا ان ربنا موجود
!!!
...

علمنى أبى أشياء كثيره
أذكرها دوما
كان يخبرنى دوما عندما يصدمنى الاخرون فى تصرفاتهم معى
إذا أكرمت الكريم ملكته
وإذا أكرمت اللئيم تمرد

ربنا يرحمك
...

آخر سؤال

مش هاسأل ليه فيه ناس شريره
كبرت ومعرفتش إجابة السؤال

هو إزاى الناس بتقدر توجع وتجرح كده
وبتعرف تغمض عنيها وتنام
!!!

ما هو تعريف الضمير

...

اللهم لك الحمد حتى ترضى

Monday, February 05, 2007

تاج دندونه




مقدرتش أتاخر أبدا على دندونه
رغم صعوبة التاج اللى مررتهولى
واللى كان محتاج أيام وأيام علشان أجاوب عليه

عاوزه خمس حاجات محدش يعرفهم عنى
ما أخبيش عليكم دى حاجه صعبه أوى
خمس حاجات !!!؟
ومحدش يعرفهم عنى !!؟
أصل اللى يعرفنى كويس هايعرف إنى مش بعرف أخبى أى حاجه
واللى حتى ما يعرفنيش كمان
ممممم


بحب القمر جدا
بستناه معظم الايام لحد ما يظهر
بخرج أدور عليه ولما الاقيه لازم ابتسم له ابتسامه كبيره أوى
مش بس بيوحشنى
بس بحس انه عارفنى كويس
أوقات كنت بحس انه طالع علشانى أنا بس
وكتير بتكلم معاه
وياما اتمنيت أطلع له وأشوف الدنيا من عنده
والناس الوحشه
علشان أشوف حجمهم أد ايه من فوق
وبالتالى ما أزعلش من حد حجمه نونو أوى كده
بحب القمر وبيسحرنى بضوئه
بحبه فى كل حالاته
ممكن ياخدنى معاه لوقت طويل
وخصوصا فى الشتا
لما يستخبى منى ورا سحابه مغيمه
ولما أتوه منه يطل عليا بابتسامه جميله اوى
اه بحبه

تانى حاجه محدش يعرفها عنى
إنى بحب بابا اوى
رغم كل اللى حكيته عنه فى مدونتى وفى حياتى لكل أصحابى وللدنيا كلها
بس دايما بحس إن محدش لسه عارف اد ايه بحبه
أوقات بحس انى أنا نفسى مكنتش عارفه أد ايه بحبه لحد ما سابنا وراح لربنا
أوقات بنسى انه توفى
خصوصا لما تحصل حاجه كبيره اوى
حلوه أو وحشه
بجرى على البيت علشان بسرعه أحكيله
وبجد بدخل البيت علشان أتفاجئ انه مش معانا
وبتخض
وأوقات بستناه يرجع
لان الايام فقدت كتير من معناها وهو مش معانا
ربنا يرحمه


حاجه كمان محدش يعرفها إنى بخاف من الضلمه أوى
رغم كل ادعائى بانى مش بخاف
بحاول أفضل دايما فى الصوره اللى طلعت لقيت الدنيا كلها راسماها لي
الكبيره ... المسؤوله دايما ... الحاجات الكتيره اوى
إبتدى الموضوع إنى مش عاوزه أخذلهم
وانتهى إنى أوقات بصدق إنى كده
لحد ما أتفاجئ باحساس معاكس
فأستغرب أوى
بس فعلا بخاف من الضلمه وبخاف جدا لو كنت لوحدى



حاجه كمان إنى بحب أخويا جدا
وبحسه دايما إبنى مش أخويا الصغير
لما بيحزن الكون كله بيسكن فى عنيا
ولما بيتألم قلبى أنا اللى بيتجرح
بحبه ومش عارفه إذا كان عارف أد إيه بحبه
وبتمنى أشوفه أسعد الناس
لانه يستحق ده جدا
ولانه فعلا أطيب حد فى الدنيا


خامس حاجه
تخص حد غالى عندى أوى
اتكلمت عنه فى آخر بوستين
نعمه كبيره من ربنا إنى قابلت المشاعر الجميله دى
شعاع من القمر لمسنا
وغلف قلوبنا
وأصبحت المشاعر اللى بيننا بتحمل ضي القمر
وسحره وابتسامته
بتكتمل معه كل الاشياء
حسيت معاه بالربيع رغم برودة الايام
كنت دايما بقول لصاحباتى انى باتمنى أقابل رجل بطعم القرفه
بحب القرفه جدا
بستمتع بيها
وبحسها دايما لها مذاق مميز... مختلف
بتضفى على الاشياء معنى جديد
وبتنقلنى معاها دايما لبعيييد
وقابلت من يحمل تميز القرفه
وكمان يشاركنى الاستمتاع بيها

وكنت دايما بقول لصاحباتى لما الدنيا تضلم أوى
ان أجمل لحظه لسه ما جاتش
الحمد لله إنى عشت أجمل لحظه اللى استنيتها كتير أوى
وكنت عارفه إنها هاتيجى
زى ما أنا عارفه إن اللحظات الجايه أجمل إن شاء الله


متشكره يا دندونه على التاج الصعب اوى ده
استمتعت بيه
بس ياريت ما تكرريهاش
:))