لو سمحتى عينك شويه

ما حدث معى فى عيادة طبيبى منذ يومين ذكرنى بموقف مختلف ولكنه يحمل كوميديا مشابهه

كنا فى الاسكندريه فى مطعم أسماك فى المرسى أبو العباس
أنا و أمى فى زيارتنا الاخيره للاسكندريه قبل اسابيع قليله

استفزتنى السيدة الضخمه الجالسة فى المائدة المجاورة لنا بصحبة زوجها الذى ينافسها ضخامة وطفليها الصبيين

استفزتنى بنظراتها الثاقبة لى ومتابعتها لحوارى مع أمى وكأنها ستشاركنا الرأى

همست لأمى .. لديها زوج وطفلين لماذا لا تهتم بشأنهم

!!!
ضحكت امى وأخبرتنى أن أكف عنها
كيف وهى تتابعنى كلما هممت برفع يدى .. او طلب زجاجة ماء .. أو حتى الرد على موبايلى

ولا تكتفى بأن ترمى أذنيها بل تنظر الينا بكل ثقه وكأننا أخطانا بالجلوس فى المائدة المجاورة لها

كنت محرجه فى اول الامر أن أشعرها أننى الحظ تطفلها على مائدتنا الصغيرة

أخيرا رفعت عينى اليها فبادلتنى نظرة بأخرى ثاقبه جافه وبدون حتى إبتسامة ترحيب بنا على مائدتنا
... عفوا .. لست انا من أتطفل عليكى
وأخبرت أمى أننى سألاعبها
ضحكت وقالت لى تماما كأبيكى
ولاعبتــــــــها

مددت يدى الى حقيبتى .. مالت برأسها لترى ما بداخل حقيبتى
وفجاه .. غيرت رأى وتركت حقيبتى
إعتدلت فى جلستها
فتحت حقيبتى مرة أخرى .. شعرت بحركتى فاستدارت سريعا لتتابع الموقف قبل ان يفوتها شيئ
اخرجت قلمى ونوتتى الصغيره .. وبدأت ارصد حركاتها
كانت كلتا عيناها فى اقصى اليسار فى محاولة منها لمتابعة ما أكتب
فجاه رفعت يدى وطلبت زجاجة ماء أخرى
لا بجد مش ممكن كده ... فيه ايه !!!؟
كل هذا وهى تسمعنى وتنظر الى بعيون بارده تماما
وامى تكاد تقع على الارض من الضحك وترجونى أن أكف عن ملاعبتها

وأخيرا جاء الاكل
وبدا الرجل فى رص اطباق الطعام امامنا
ورمقتها بطرف عينى – انا الخجله من ان ترانى – ويبدو انها كانت تعقد مقارنة بين الاصناف التى طلبناها وبين ما على ما ئدتها بالفعل
كان نفسى اقولها اكلك ها يبرد مش تاكلى بقى وتنسينا شويه
كانت وكانها قطعت على نفسها عهدا بأن لا تدعنا وشاننا
حتى عندما كنا نتحدث انا وامى ... انظر اليها فاجدها مستديرة تماما لتسمع حوارنا
واخفض صوتى فتقترب بجسدها من مائدتنا
بجد مش ممكن

ترجونى امى ان اخفض صوتى .. ما يصحش هاتسمعك
يا ماما ما تسمع هى المفروض اللى تتكسف
يمكن بتشبه علينا ... تعرفيها طيب ؟
والله يا بنتى اول مره اشوفها
حاولنا ان ننشغل عنها

الغريب ان زوجها كان مركز جدا مع الاولاد واكلهم ومالوش دعوه بيها خالص
ولا حتى قالها انتى ما بتاكليش معانا ليه
ولا فكر يقول لها سيبى الناس فى حالها وخليكى معانا شويه
مع انى اعرف ان الامومه دى مشاعر قويه جدا
كنت متخيله انها اقوى من اى فضول بس طلعت غلطانه
الحمد لله انهم خلصوا ومشيوا قبلنا بشويه صغيره تمكننا فيها من الاكل بهدوء وبدون عيون متلصصه

هى الناس جرى لها ايه ؟؟
اتغيروا كده ليه ؟
فين الذوق ؟

اقترحت على أمى ان نتمشى قليلا على الشاطئ فوافقتنى

كنا نحكى عنها طوال الوقت

وفجاه وجدتها تجلس على السور

وتنظر الينا نظرات فاحصه

لاااااااااا مش ممكن

تاااااااااااكسى

مصر يا أسطى لو سمحت