حنيـــــــــن

Sunday, October 01, 2006

افتح قلبك










بتحبها... ؟
مستنى ايه علشان تقول لها ..!!! ماتعرفش ايه بيجرى عندها

بتحبيه...؟
مش عارفه أقولك ايه..!!! حافظى عليه اهتمى بيه وراعيه

غيرانه منها...؟
قربى ... اتعلمى منها هاتحبى نفسك أكتر

شايل منه...؟
عاتبه .. هاتلاقى سند ليك

زعلانه منها...؟
افتحى قلبك لها .. هاتكسبى حضن جديد

محرج منه...؟
روح إسال عنه .. ماتعرفش بكره هاتبقى فين وهايروح هو فين

ماتستناش لبكره أبدا ... يمكن بكره ما يجيش
أو ييجى بس التانى ماتلاقيش
خساره أوى تخسر حد غالى عليك
وقتها بس هاتحس أد ايه انت وحيد
والدنيا بقت أبيض واسود
مافيش وقت
افتح قلبك
وقول لكل الدنيا بحبك

12 Comments:

  • @>-->--

    That's a text rose :)

    By Blogger عمرو إبراهيم, at Sunday, October 01, 2006 12:39:00 AM  

  • و تفتكرى لما هيتكلم او هتتكلم
    التانى هيفهم

    وان اتكلم مرة واتنين و عشرين
    وبرضه مش لاقى شئ

    برضه يتكلم ؟؟؟؟؟؟

    انا فى رأيى معتقدش

    لازم الانسان يفضل يحاول مرة واتنين و عشرين .....بس فيه حاجة فى الاخر بتطلع بتقول
    game over

    تحياتى على الموضوع
    :)

    By Blogger شيمـــــاء, at Sunday, October 01, 2006 1:32:00 AM  

  • عشرين !!!؟
    :(((
    هو حبيبها ولا عتاب .. غيره .. خصام؟

    أنا معاكى انه كتير أوى

    أوقات بنقابل ناس فى حياتنا غاليين أوى علينا
    يمكن أكتر من نفسنا

    وقتها مش بنحس احنا فى المره الكام
    كل اللى بيعنينا انهم يفضلوا نجمه فى سمانا .. حتى لو نجمه بعيده .. راضيين ومتونسين بيهم

    بس زى ما بتقولى كده
    لازم ها ييجى وقت نحس فيه انه خلاص ماينفعش

    الفيونكه الجميله اللى بتربط اتنين لازم يشارك في ربطها الاتنين .. والا ها تخنق التانى

    ماينفعش تبقى من طرف واحد

    احنا ممكن نبتدى
    نسامح
    نغفر
    ننسى
    نقلب صفحه ضلمه

    بس مش هانقدر نحب - كل الوقت - اللى مش سامعنا أو شايفنا ولا حتى حاسس بينا


    وقتها بيبقى الشخص ده محتاج مساندتنا كلنا
    على أد الالم اللى بيعانيه

    يارب كل اللى بنحبهم يشوفونا
    ويبادلونا المشاعر

    لانه احساس صعب علينا
    نهتم ونحافظ على اللى مش حاسس بينا

    By Blogger حنيــــــن, at Sunday, October 01, 2006 4:46:00 AM  

  • يا رب
    يا رب فعلا اللى بنحبهم يحسوا بينا
    واللى ليهم مكانة جوانا يعرفونا

    ويا رب برضه نحس باللى بيحبونا

    لكن نقول إيه
    هى الدنيا كدة
    ما تبقاش دنيا من غير معاناة!

    واحد بيحب واحدة وهى حبت غيره
    وغيره بيحب رابعة نفسه تكون طيرُه
    عجبى عليك يا القلب حابب دى ليه قوللى
    مع إن غيرها كتير دايبين فى تأثيره
    عجبى!!

    By Blogger عمرو إبراهيم, at Sunday, October 01, 2006 10:18:00 AM  

  • ثانية واحدة
    اللى انا باتكلم عليه ده
    مالوش دعوة بجزئية الحب

    من معلوماتى الضعيفة فى هذا المجال بالذات
    ان الحب ليه تأثير و شعاع وقصة تانية خالص
    حتى لو الناس بعدوا عن بعض سنيين وبقالهم حياة ا خرى ..لما بيجيى سيرة الطرف التانى بيبقى له تأثير مهما كان

    انا اللى باتكلم فيه جزئية العتاب او لفت النظر
    هى دى اللى بتبقى
    game over بجد

    انا شخصيا جربتها كذا مرة
    و فيه مرة كانت طويلة شوية
    كانت الgame over
    بعد 7 سنيين

    اتمنى انى اكون وضحت وجهة نظرى

    By Blogger شيمـــــاء, at Sunday, October 01, 2006 11:19:00 AM  

  • نسيت احييكى على الجملة دى


    بس مش هانقدر نحب - كل الوقت - اللى مش سامعنا أو شايفنا ولا حتى حاسس بينا


    لأنه ببساطة هيكون فقد كتير من رصيد مش هيتعوض تانى خلاص مهما حصل

    By Blogger شيمـــــاء, at Sunday, October 01, 2006 11:22:00 AM  

  • يا شيماء أنا كانقصدى بالحب أى علاقة إنساتية
    وإن كنت موافقك إن الحب علاقة غير أى غلاقة

    By Blogger عمرو إبراهيم, at Sunday, October 01, 2006 11:29:00 AM  

  • يعنى أنا أنام شويه أصحى ألاقى كل التطورات الجميله دى
    :)
    مختلفين على ايه بس ؟

    كل العلاقات اللى فى الدنيا حب

    بنزعل من " الصديق" اللى بنحبه
    ومش هانعاتب " زميلنا حتى " الا لو بنحبه
    وها يكسرنا بس " الحبيب " اللى بنحبه

    الناس اللى بتفرق معانا هى اللى ليها رصيد حب فى قلبنا

    احنا بنحب كل الحاجات

    أهلنا وأصدقائنا وزملائنا وأحبائنا
    بنحب شغلنا وأحلامنا
    بنحب بيتنا وشجرتنا

    كل دى علاقات هاتبقى جميله اوى لو قابلنا فيها اللى يحس بينا ويكملنا
    وبجد منوريننى
    :)

    By Blogger حنيــــــن, at Sunday, October 01, 2006 1:03:00 PM  

  • كلامك مظبوط يا حنين
    بس اللى انا اقصده
    انه بيجي وقت ويقول ايه

    لقد نفذ رصيدكم من هذا الحب

    :) تحياتى و صحى النوم

    By Blogger شيمـــــاء, at Sunday, October 01, 2006 1:31:00 PM  

  • بخاف أوى من الكلمه دى
    ...
    وقتها بيتحول كل الحب اللى كان الى
    حنيـــن

    By Blogger حنيــــــن, at Sunday, October 01, 2006 1:36:00 PM  

  • صح ...بس اكيد مش ذنب اللى حاول كتير
    ذنب اللى مفهمش اللى اتقاله كتير

    By Blogger شيمـــــاء, at Sunday, October 01, 2006 2:15:00 PM  

  • موافق تماما يا شيماء
    مش ذنب اللى حاول كتير
    ذنب اللى مفهمش اللى اتقاله كتير

    أنا على طول رأيي إن العلاقات الثنائية مهم فيها الاستقبال زى الإرسال إن ماكانش أهم

    يعنى الشخص اللى بيدى عليه عامل
    لكن اللى بياخد لو مافهمش اللى بيديهوله
    أو لو ما استقبلهوش كما ينبغى
    بيبقبى حاجة ماسخة جدا على اللى بيدى

    By Blogger عمرو إبراهيم, at Sunday, October 01, 2006 9:37:00 PM  

Post a Comment

<< Home