كفااااااااااااااااايه

يا بابا انا دلوقتى فاطر بقى لى 9 ايام ... أدفع كام عن كل يوم لافطار واحد صايم
يا بابا ساكت ليه ؟
بفكر اهو ... احنا نسال شيخ
انا هاروح اى جامع واسيب الفلوس يحطوها فى مائدة الرحمن واللى هايكون نصيبه بقى ده رزقه
بس ادفع كام؟

شايف الفانوس الكبير ده ؟

فينه؟

اهو هناك اهو يا بابا

رنة موبايل عاليه

أيوه يا احمد
انا لسه مستنى دورى ... انت فين ؟طيب ما تنساش الكنافه معاك ... سلام

سيده عجوز جميله لسه نازله من على الشجره حالا
كل لبسها أخضر فى أخضر من أول توكة شعرها لحااااااااااااااااااااد السابو
:) مالحقتش آخد بالى منها كويس

موبايل تانى وبرده عالى
صوت هامس

انت يا بابا اللى أخرتنى ... لو كنت جيت لقيتك لابس كنا زماننا مخلصين دلوقتى
وهاتفرق ايه يعنى ؟
ماكانش هايبقى أدامنا 14 واحد

يا خبر ؟
ده أنا رقم 16 يعنى لسه أدامى كتير

يا ابنى مش على ما صليت الضهر ولبست ؟
كنت تصليه هنا

وكالعاده يسكن الحوار فجأه بدون قفله ... تماما كما يبدأ بينهما

أخبار العياده بتاعت أحمد إيه ؟
ماتخافش هانوضبهاله وهاتبقى زى الفل
البت كانت عاوزه تاخدها
البت مين ؟ إيمان ؟

حالتى لا تسمح لى بأن أستدير لأرى تعابير وجههم
وفضولى العادى لم يكن ليصل ابدا لهذا الحد
ولكن فعلا كنت عاوزه أشوف تعابير وجههم يمكن أفهم ازاى بيبدا الحوار بينهم وينتهى فجاه كده ؟

إنقسمت العياده الى فريقين منهمكين تماما
احدهما ماسك الموبايل ما بين رساله ومكالمه ويمكن جييم
والآخر ماسك المصحف وبيقرا بانهماك شديد

هو اللى جوه ده مش ناوى يطلع بقى ؟
انت كل مره على كده ؟
كل مره


نص حبايه بالليل حبايه الضهر
هاتقوله يقلل الدوا ؟
ماتقوله انت
اومال يا بابا أنا جايبك معايا ليه ؟
يا ابنى هو أدرى بالعلاج إزاى
يا بابا أنا حاسس بنفسى ... ادينى فرصه بس

لو عاوز حد ينضفلى الشقه أجيب مين ؟
هات جوز سعيده

غريبه اوى فاكر اسم الست وناسى اسم جوزها ؟
وانا مالى بس

مين ده ؟ اللى بيمسح السلم ؟
لا ده فتحى
اومال مين ... اللى عنده سرطان ده ؟
لا يا ابنى مش ده
اومال مين بس يا بابا

وهنا جائتنى مكالمه فلم أتابع الحوار وبالتالى معرفتش مين اللى هاينضف الشقه

كنت قد حاولت التركيز فى القرءه فى المصحف ولكنى لم استطع ان اركز منهم
والعياده زحمه اوى مافيش مكان فاضى انتقل بعيد عنهم
هل يرى الآخرون أنفسهم كما نراهم نحن ؟
لماذا نرفع أصواتنا ونحن نستقبل مكالماتنا الشخصيه فلا تعدو شخصيه

باين اننا قربنا
الحمد لله يبقى انا كمان قربت

رنة موبايل جديده
ألو اهلا حسن إزيك يا حسن والله كنت تعبان يا حسن
هاهاها ... هاهاها الله يخليك يا حسن
آآآ اخبارك ايه .. يعنى انا فى زياره بره عند ناس كده
بكره هانزل الشغل ان شاء الله خلينا نشوفك
كله يهون لا اله الا الله

ده مين ده ؟
ده حسن يا بابا
مين حسن ده
يصمت قليلا

ده واحد معايا فى الشغل

شايف الب... ويهمس الصوت تماما

تمر فتاة جميله أمامى
يا سلاااااااااااااااااااام
يعنى بتعرفوا توطوا صوتكم أهو
اومال داوشيننى ليه من الصبح بحسن وجوز سعيده والسلم

أقفل المجله مادام خلصتها
لسه هاكمل يا بابا

أستاذ ايهاب اتفضل
يلا ؟
يلا يا بابا
ياااااااااااااااااااااااااه يعنى انا دورى قرب خلاص
الآن فقط أستطيع ان أرى بابا وابنه

بابا عجوووووز يتكئ على عصاه ويابابا يا بابا ده رجل طويل وعريض ما شاء الله ما ينفعش يقول يا بابا ابدا

هو ينفع يكون هو نفسه بابا

:)))

أد يه الهدوووء جميل